Vilhjálmur berst fyrir hagsumum fárra og hunsar hagsmuni þjóðarinnar í heild!

Vilhjálmur Egilsson og útgerðarkónar hans verða að gera sér grein fyrir því að þjóðin lætur ekki bjóða sér lengur að auðlindir hennar (þjóðin á jú auðlindir hafsins) séu misnotaðar af fáum útvöldum.

Ef Vilhjálmur er svo einfaldur að trúa þeirri þvælu sem útgerðarmenn bera á borð fyrir hann og þjóðina, þá er honum ekki við bjargandi. Það er enginn að tala um að taka af þeim veiðiheimildir, eingöngu að leiga fyrir þessar veiðiheimildir renni í ríkissjóð en ekki til fárra útgerðarmanna, sem jafnvel liggja á sólarströnd og fá leiguna af kvótanum lagða reglulega inná erlenda reikninga til eigin nota. Á meðan stritar þorri útgerðarmanna við að láta enda ná saman, til þess að borga þessa okurleigu til þeirra sem fengu kvótann gefins á silfurfati í tíð Halldórs Ásgrímssonar.

Þessu verður að ljúka og treysti ég og flestir íslendingar, henni Jóhönnu til þess að láta þessa kóna ekki vaða yfir sig og ríkisstjórnina á skítugum skónum.

Áfram ísland!!

Vilja að skötuselslög verði afnumin

Kennitöluflakk!!

Gjaldþrot fyrirtækja þíðir ekki endilega að viðkomandi aðilar hætti starfsemi. Því miður virðist það vera viðurkennt í þjóðfélaginu og af yfirvöldum, að aðilar sem setja eitt fyrirtæki í gjaldþrot, geti haldið áfram starfsemi við sömu verk og með sama starfskraft undir nýrri kennitölu. Þannig losna menn (jú það eru nú menn sem standa á bak við hvert fyrirtæki) við að borga byrgjum, verktökum og öðrum kröfuhöfum það sem þeim ber. Siðlaust en löglegt.

Byggingar og verktakabransinn er mjög slæmur að þessu leiti og er ekki hægt að treysta jafnvel aðilum sem lengi hafa verið í þessu bransa og kannski einna síst. Varast ber þó að setja alla undir sama hatt þar sem heiðarlegir menn eru innanum í þessum frumskógi. Siðleysið virðist ekki ætla að lagast eftir hrunið, síður en svo. Nú færa menn til eignir og breyta nöfnum á rótgrónum fyrirtækjum til þess að setja á hausinn og fá hreinar kennitölur og halda áfram rekstri eins og ekkert hafi í skorist. Þetta hefur aldrei verið verrra en núna eins og tölur gefa til kynna. Siðlaust en löglegt. 

Breyta þarf lagaumhverfi þannig, að menn sem setja eitt fyrirtæki á hausinn geti ekki hafið rekstur eða verið í stjórnum fyrirtækja í einhver ár á eftir. Herða þarf eftirlit og reglur þannig að eignum verði ekki skotið undan. Kalla þarf stjórnvöld til ábyrgðar um að breyta lögum og innleiða betra viðskiptasiðferði í þjóðfélaginu, ekki veitir af.

95 fyrirtæki í þrot í júní

Hrós til Ómars Stefánssonar!

Ómar Stefánsson bæjarfulltrúi Framsóknarflokksins í Kópavogi á hrós skilið fyrir að tala opinberlega og á heiðarlegan hátt um þá vitleysu sem átt hefur sér stað í stjórn Lífeyrissjóðs Kópavogs. Enn og aftur kemur fram hversu spillt vinnubrögð Gunnar I. Birgisson viðhefur, hvort sem um er að ræða störf í nefndum og ráðum eða fyrir hönd Kópavogsbæ sem Bæjarstjóri og fulltrúi síns flokks. FME gerir alveg rétt í að kæra þessa framkvæmd.

Hreinsa þarf til á opinberum vettvangi og losna við spillta stjórnendur úr nefndum og ráðum.

Verið að leyna FME staðreyndum

Eru sjálfstæðismenn alveg blindir?

Sjálfstæðismenn eru varla svo blindir að sjá ekki að viðskipti Gunnars við fyrirtæki dóttur sinnar, geti varla talist eðlileg. Gunnar hefur misnotað aðstöðu sína og ber ábyrgð á öllu þessu máli í heild sinni, sem persóna og sem bæjarstjóri. Þeir sjálfstæðismenn sem eru að hvetja Gunnar til þess að sitja áfram, eru að skemma fyrir flokknum og þar með flokksbræðrum sínum.

Kveðjum Gunnar.

Vilja ekki að Gunnar hætti

Ótrúlegar hækkanir!

Það er með ólíkindum að hækkaðir skulu neysluskattar þegar þeir fara beint út í verðlagið og hækka þannig vísitölu neysluverðs, sem aftur skilar sér í hækkunum á húsnæðislánum og öðrum vísitölutryggðum lánum. Það væri kannski í lagi að beita þessum úrræðum ef afnumin hefði verið vísitölutrygging lána en því þora stjórnmálamenn ekki. Keyra þarf niður okurvexti í þjóðfélaginu en ekki fara í aðgerðir sem hækka þá.

Ég spyr;  er þetta hjálpin við heimilin í landinu?

Nær hefði verið að hækka beina tekjuskatta og draga úr styrkjum og óþarfa eyðslu á vegum hins opinbera. Minnka umsýslu ráðuneyta, ferðakostnað og styrki. Einnig mætti leggja niður rekstur dýrra sendiráða um allan heim. Draga þannig úr eyðslu í opinberum rekstri og veita þeim peningum sem þannig fást í atvinnuuppbyggingu.

Ég hvet fólk til þess að láta í sér heyra og láta ekki bjóða sér þessa vitleysu.

Bensínið aldrei dýrara

Hreinsa þarf til á fleiri stöðum!

Það er greinilegt að hreinsa þarf til á fleiri stöðum en á Alþingi og seðlabanka Íslendinga. Ekki veitir af að smúla út spillinguna og sóðaskapinn hjá bæjarstjórn Kópavogs. Það eru greinilega reitur ennþá eftir af spilltum einstaklingum í stjórnkerfi borga og bæja, sem svífast einskis til þess að skara eld að sinni köku. Skirrast svo ekki við að koma keikir í fjölmiðla og tala um skítakast á sig og sína. Siðblindan er alger og tími fyrir þessa menn að taka pokann sinn. Ef þeir gera það ekki með góðu, þarf að svæla þá út eins og púka af fjósbita.

Nú er lag!

Ræddu hugsanleg meirihlutaslit